भारतीय सीमा सुरक्षा बल (आईटीबीपी) का महानिर्देशक सवार हेलिकोप्टरले नेपाल सरकारको पूर्वस्वीकृतिबिना नेपाली हवाई क्षेत्र प्रयोग गरेको घटना सार्वजनिक भएको छ। कालापानी क्षेत्रको गुञ्जीस्थित युनिट निरीक्षणका लागि उडेको उक्त हेलिकोप्टर गत मंगलबार दार्चुला क्षेत्रको नेपाली आकाश हुँदै गएको बताइएको छ।
अन्तर्राष्ट्रिय अभ्यासअनुसार कुनै पनि देशको अनुमति नलिई अर्को देशको हवाई क्षेत्र प्रयोग गर्नुलाई हवाई क्षेत्र उल्लंघनको रूपमा लिइन्छ। घटनापछि दार्चुला प्रशासनले भारतीय पक्षको ध्यानाकर्षण गराएको जनाएको छ।
प्रमुख जिल्ला अधिकारी अनिल पौडेलले हेलिकोप्टर नेपाली भूमिमा अवतरण नगरे पनि नेपाली आकाश प्रयोग गरेको देखिएको जानकारी दिए। उनले यस्ता गतिविधि पूर्वजानकारी र आवश्यक अनुमति बिना हुन नहुने भन्दै भारतीय प्रशासनसँग मौखिक रूपमा कुरा भइसकेको बताए।
प्रशासनका अनुसार उक्त दिन मौसम सामान्य रहेकाले उडान मार्ग परिवर्तन गर्नुपर्ने अवस्था थिएन। साथै, उडानअघि भारतीय पक्षबाट कुनै जानकारी पनि नआएको बताइएको छ। घटनाबारे थप जानकारी लिन पिथौरागढस्थित भारतीय प्रशासनसँग औपचारिक रूपमा सोधपुछ गर्ने तयारी भइरहेको छ।
यसअघि पनि दार्चुला–कालापानी क्षेत्रमा भारतीय हेलिकोप्टरहरूले नेपाली आकाश प्रयोग गरेको विषयमा विवाद उत्पन्न हुँदै आएको छ। यस्ता घटनाले सीमा क्षेत्रको संवेदनशीलता र हवाई क्षेत्रको सम्मानबारे पुनः प्रश्न उठाएको छ।
