महेन्द्रनगर — नेपाली कांग्रेसका प्रभावशाली नेता रमेश लेखक र एनपी साउद आज सुदूरपश्चिम यात्रामा निस्किएका छन्। सुदूरपश्चिम कांग्रेसको संगठनात्मक अवस्था, स्थानीय नेता–कार्यकर्तासँगको संवाद तथा आगामी राजनीतिक रणनीतिका दृष्टिले उनीहरूको यो भ्रमणलाई अर्थपूर्ण रूपमा हेरिएको छ।
कञ्चनपुरलाई राजनीतिक आधार क्षेत्र बनाएका लेखक र साउद सुदूरपश्चिम कांग्रेसमा लामो समयदेखि प्रभाव राख्ने नेताका रूपमा चिनिन्छन्। लेखक कञ्चनपुर क्षेत्र नम्बर ३ तथा साउद क्षेत्र नम्बर २ बाट राष्ट्रिय राजनीतिमा स्थापित भएका नेता हुन्। दुवै नेताले विगतमा मन्त्री तथा पार्टीको महत्वपूर्ण जिम्मेवारी सम्हालिसकेका छन्।
विशेषगरी कांग्रेसको आगामी राजनीतिक दिशा र नेतृत्व व्यवस्थापनको बहसका बीच उनीहरूको संयुक्त सक्रियतालाई महत्वका साथ हेरिएको छ। पछिल्लो समय दुवै नेताको नाम कांग्रेसको केन्द्रीय नेतृत्वमा महत्वपूर्ण भूमिकाका सम्भावित दाबेदारका रूपमा समेत चर्चामा आउने गरेको छ।
सुदूरपश्चिम किन महत्वपूर्ण?
सुदूरपश्चिम नेपाली कांग्रेसका लागि केवल संगठनात्मक आधार क्षेत्र मात्र नभई पार्टीको राष्ट्रिय राजनीतिक समीकरणमा पनि महत्वपूर्ण प्रदेश हो। पूर्वसभापति शेरबहादुर देउवाको लामो राजनीतिक प्रभाव रहेको यस क्षेत्रमा पछिल्लो समय कांग्रेसभित्र नयाँ पुस्ता र नेतृत्वको भूमिका, संगठन सुदृढीकरण तथा आगामी निर्वाचनको तयारीबारे बहस तीव्र छ। विभिन्न राजनीतिक विश्लेषणमा पनि देउवापछिको सुदूरपश्चिम कांग्रेसको नेतृत्व कसले सम्हाल्ने भन्ने विषयमा लेखक, साउदलगायत नेताहरूको नाम चर्चामा आउने गरेको छ।
त्यसैले लेखक र साउदको आजको भ्रमणलाई सामान्य भेटघाट वा जिल्ला भ्रमणभन्दा पर संगठन सुदृढीकरण, कार्यकर्तासँग प्रत्यक्ष संवाद र आगामी राजनीतिक रणनीति निर्माणको प्रयासका रूपमा समेत हेेेरिएको छ।
